farogh-e-gul se alag barq-e-ashiyan se alag

faroġh-e-gul se alag barq-e-āshiyāñ se alag

lagī hai aag yahāñ se alag vahāñ se alag

sukūt-e-nāz ne iz.hār kar diyā jis kā

vo ek baat thī pairāya-e-bayāñ se alag

suneñ to ham bhī zarā jabr-o-iḳhtiyār kī baat

kahāñ kahāñ haiñ ye shāmil kahāñ kahāñ se alag

hamārā haal zamāne se kuchh judā to nahīñ

ye dāstāñ nahīñ duniyā kī dāstāñ se alag

ḳhizāñ kā zikr hī kyā hai ki ai 'ravish' ham ne

bharī bahār guzārī hai gulsitāñ se alag

farogh-e-gul se alag barq-e-ashiyan se alag

lagi hai aag yahan se alag wahan se alag

sukut-e-naz ne izhaar kar diya jis ka

wo ek baat thi pairaya-e-bayan se alag

sunen to hum bhi zara jabr-o-iKHtiyar ki baat

kahan kahan hain ye shamil kahan kahan se alag

hamara haal zamane se kuchh juda to nahin

ye dastan nahin duniya ki dastan se alag

KHizan ka zikr hi kya hai ki ai 'rawish' hum ne

bhari bahaar guzari hai gulsitan se alag