farogh-e-sham ka manzar us aaftab mein tha

faroġh-e-shām kā manzar us āftāb meñ thā

kiran kiran vo ujālā thā par hijāb meñ thā

tire badan kī tamāzat thī jis se aag lagī

chaman meñ barq na sho.ala koī gulāb meñ thā

mire qarīb rahā phir bhī mujh ko paḌh na sakā

mirā vajūd to mahfūz ik kitāb meñ thā

zamāne-bhar kī nazar se jo bach gayā yaaro

vo shaḳhs merī nigāhoñ ke intiḳhāb meñ thā

khulā jo nāma-e-a.amāl hashr meñ merā

bas ek jurm-e-mohabbat mire hisāb meñ thā

maiñ āshnā-e-mohabbat to be-qarār hī thā

vo āshnā-e-mohabbat na thā azaab meñ thā

maiñ dekhtā hī rahā pattharoñ kī bārish meñ

mire habīb kā chehra bhī ik naqāb meñ thā

farogh-e-sham ka manzar us aaftab mein tha

kiran kiran wo ujala tha par hijab mein tha

tere badan ki tamazat thi jis se aag lagi

chaman mein barq na shoala koi gulab mein tha

mere qarib raha phir bhi mujh ko paDh na saka

mera wajud to mahfuz ek kitab mein tha

zamane-bhar ki nazar se jo bach gaya yaro

wo shaKHs meri nigahon ke intiKHab mein tha

khula jo nama-e-amal hashr mein mera

bas ek jurm-e-mohabbat mere hisab mein tha

main aashna-e-mohabbat to be-qarar hi tha

wo aashna-e-mohabbat na tha azab mein tha

main dekhta hi raha pattharon ki barish mein

mere habib ka chehra bhi ek naqab mein tha