fart-e-kahish ki inayat se pinhan ho kar

fart-e-kāhish kī ināyāt se pinhāñ ho kar

yaar ke dil meñ rahā kartā huuñ armāñ ho kar

vasl kī shab meñ rag-e-kākul-e-pechāñ ho kar

un kī gardan se lipaTtā huuñ garebāñ ho kar

zulf kī yaad shab-e-hijr meñ afsos afsos

jī Darātī hai mirā af.ī-e-pechāñ ho kar

koī kahtā hai jo achchhī to samajhtā huuñ burī

josh-e-ulfat se mizāj-e-but-e-nādāñ ho kar

sāqiyā mahfil-e-zindāñ meñ urūs-e-bāda

bar meñ sāġhar ke rahā kartī hai jānāñ ho kar

bhar diyā ashk-e-guhar-zā se hamārā dāman

shab-e-ġham meñ sadaf-e-chashm ne naisāñ ho kar

joshish-e-ishq ye dekho ki dil-e-dilbar meñ

aaya ġhusse kī tarah niklā maiñ armāñ ho kar

kaar mansūr kā furqat meñ dikhāte haiñ tujhe

dār-e-mizhgāñ pe mire ashk numāyāñ ho kar

parvarish sāya-e-gardan ne kiyā hai ham ko

muddatoñ tak rahe paivand-e-garebāñ ho kar

josh par aatī hai jis vaqt ki betābī-e-dil

uTh khaḌā hotā huuñ tāzīm-e-bayābāñ ho kar

tā-dam-e-zīst rahā yār-e-parī-rū tasḳhīr

harf-e-ḳhātam hue ham naqsh-e-sulaimāñ ho kar

ḳhaak hone pe rahā āshiq-o-māshūq se rabt

gor-e-bulbul banī āġhosh-e-gulistāñ ho kar

duḳht-e-raz lailā ke mānind hayā kartī hai

mahmil-e-shīsha meñ har tarah se pinhāñ ho kar

mehrbānī sifat-e-ashk kiyā karte haiñ

ai 'shagufta' vo mirī god meñ shādāñ ho kar

fart-e-kahish ki inayat se pinhan ho kar

yar ke dil mein raha karta hun arman ho kar

wasl ki shab mein rag-e-kakul-e-pechan ho kar

un ki gardan se lipaTta hun gareban ho kar

zulf ki yaad shab-e-hijr mein afsos afsos

ji Daraati hai mera afi-e-pechan ho kar

koi kahta hai jo achchhi to samajhta hun buri

josh-e-ulfat se mizaj-e-but-e-nadan ho kar

saqiya mahfil-e-zindan mein urus-e-baada

bar mein saghar ke raha karti hai jaanan ho kar

bhar diya ashk-e-guhar-za se hamara daman

shab-e-gham mein sadaf-e-chashm ne naisan ho kar

joshish-e-ishq ye dekho ki dil-e-dilbar mein

aaya ghusse ki tarah nikla main arman ho kar

kar mansur ka furqat mein dikhate hain tujhe

dar-e-mizhgan pe mere ashk numayan ho kar

parwarish saya-e-gardan ne kiya hai hum ko

muddaton tak rahe paiwand-e-gareban ho kar

josh par aati hai jis waqt ki betabi-e-dil

uTh khaDa hota hun tazim-e-bayaban ho kar

ta-dam-e-zist raha yar-e-pari-ru tasKHir

harf-e-KHatam hue hum naqsh-e-sulaiman ho kar

KHak hone pe raha aashiq-o-mashuq se rabt

gor-e-bulbul bani aaghosh-e-gulistan ho kar

duKHt-e-raz laila ke manind haya karti hai

mahmil-e-shisha mein har tarah se pinhan ho kar

mehrbani sifat-e-ashk kiya karte hain

ai 'shagufta' wo meri god mein shadan ho kar