فرط نشاط ان کے غم بے کراں میں ہے

فرط نشاط ان کے غم بے کراں میں ہے

یہ دولت حیات دل کامراں میں ہے

ایسا ہے کون جس کو شغف حسن سے نہیں

جلوہ گری تو حسن کی کون و مکاں میں ہے

محو خرام ناز وہ ہوں جس چمن میں بھی

ساری بہار جیسے اسی گلستاں میں ہے

کرنا ضرور ہے ہمیں روشن چراغ رہ

تاریکیوں کا ساتھ رہ کارواں میں ہے

رحمت خدا کی ہم پہ برستی ہے رات دن

ہر دم خدا کا شکر زبان و بیاں میں ہے

سارے جہان میں بھی میسر کہیں نہیں

جو راحت و سکوں مرے ہندوستاں میں ہے

قید غم حیات سے باصرؔ مفر کہاں

یہ زندگی تمام رہ امتحاں میں ہے