fart-e-nashat un ke gham-e-bekaran mein hai

fart-e-nashāt un ke ġham-e-bekarāñ meñ hai

ye daulat-e-hayāt dil-e-kāmrāñ meñ hai

aisā hai kaun jis ko shaġhaf husn se nahīñ

jalvagarī to husn kī kaun-o-makāñ meñ hai

mahv-e-ḳhirām-e-nāz vo hoñ jis chaman meñ bhī

saarī bahār jaise usī gulsitāñ meñ hai

karnā zarūr hai hameñ raushan charāġh-e-rah

tārīkiyoñ kā saath rah-e-kārvāñ meñ hai

rahmat ḳhudā kī ham pe barastī hai rāt-din

har dam ḳhudā kā shukr zabān-o-bayāñ meñ hai

saare jahān meñ bhī mayassar kahīñ nahīñ

jo rāhat-o-sukūñ mire hindostāñ meñ hai

qaid-e-ġham-e-hayāt se 'bāsir' mafar kahāñ

ye zindagī tamām rah-e-imtihāñ meñ hai

fart-e-nashat un ke gham-e-bekaran mein hai

ye daulat-e-hayat dil-e-kaamran mein hai

aisa hai kaun jis ko shaghaf husn se nahin

jalwagari to husn ki kaun-o-makan mein hai

mahw-e-KHiram-e-naz wo hon jis chaman mein bhi

sari bahaar jaise usi gulsitan mein hai

karna zarur hai hamein raushan charagh-e-rah

tarikiyon ka sath rah-e-karwan mein hai

rahmat KHuda ki hum pe barasti hai raat-din

har dam KHuda ka shukr zaban-o-bayan mein hai

sare jahan mein bhi mayassar kahin nahin

jo rahat-o-sukun mere hindostan mein hai

qaid-e-gham-e-hayat se 'basir' mafar kahan

ye zindagi tamam rah-e-imtihan mein hai