فرزانے تو زعم خرد میں آپ اپنے صیاد ہوئے

فرزانے تو زعم خرد میں آپ اپنے صیاد ہوئے

قید زماں اور بند مکاں سے دیوانے آزاد ہوئے

چاند ستاروں کی دنیا میں کیا رونق ہے کیا ہلچل

شکر ہے اپنے جوش جنوں سے ویرانے آباد ہوئے

عشق کے ہاتھوں کیسے کیسے لوگ ہوئے ہیں خاک بسر

کیا بتلائیں اس فتنہ سے کتنے گھر برباد ہوئے

کون ہے جو اس راز کو سمجھے کس کو ہم یہ بات بتائیں

تیرے غم کی دولت پا کر ہم کتنے دل شاد ہوئے

سارے جہاں میں عام ہیں جن کی معصومیت کے چرچے

شان خدا کی اپنے حق میں لوگ وہی جلاد ہوئے

ان کی محفل ساز بھی ان کے ان کا زمانہ ان کی بہار

ان کے نالے نغمے ٹھہرے گیت اپنے فریاد ہوئے

برسوں شعر و سخن کی خاطر خون دل سے کام لیا

میرؔ سے شاعر تب اے منشاؔ اس فن میں استاد ہوئے