fasad-e-duniya miTa chuke hain husul-e-hasti miTa chuke hain

fasād-e-duniyā miTā chuke haiñ husūl-e-hastī miTā chuke haiñ

ḳhudā.ī apne meñ pā chuke haiñ mujhe gale ye lagā chuke haiñ

nahīñ nazākat se ham meñ tāqat uThā.eñ jo nāz-e-hūr-e-jannat

ki nāz-e-shamshīr-e-pur-nazākat ham apne sar par uThā chuke haiñ

najāt ho yā sazā ho merī mile jahannam ki pā.ūñ jannat

ham ab to un ke qadam pe apnā gunah-bharā sar jhukā chuke haiñ

nahīñ zabāñ meñ hai itnī tāqat jo shukr laa.eñ bajā ham un kā

ki dām-e-hastī se mujh ko apne ik haath meñ vo chhuḌā chuke haiñ

vajūd se ham adam meñ aa kar makīñ hue lā-makāñ ke jā kar

ham apne ko un kī teġh khā kar miTā miTā kar banā chuke haiñ

yahī haiñ adnā sī ik adā se jinhoñ ne barham hai ki ḳhudā.ī

yahī haiñ aksar qazā ke jin se farishte bhī zak uThā chuke haiñ

ye kah do bas maut se ho ruḳhsat kyuuñ nāhaq aa.ī hai us kī shāmat

ki dar talak vo masīh-ḳhaslat mirī ayādat ko aa chuke haiñ

jo baat maane to ain shafqat na maane to ain husn-e-ḳhūbī

'rasā' bhalā ham ko daḳhl kyā ab ham apnī hālat sunā chuke haiñ

fasad-e-duniya miTa chuke hain husul-e-hasti miTa chuke hain

KHudai apne mein pa chuke hain mujhe gale ye laga chuke hain

nahin nazakat se hum mein taqat uThaen jo naz-e-hur-e-jannat

ki naz-e-shamshir-e-pur-nazakat hum apne sar par uTha chuke hain

najat ho ya saza ho meri mile jahannam ki paun jannat

hum ab to un ke qadam pe apna gunah-bhara sar jhuka chuke hain

nahin zaban mein hai itni taqat jo shukr laen baja hum un ka

ki dam-e-hasti se mujh ko apne ek hath mein wo chhuDa chuke hain

wajud se hum adam mein aa kar makin hue la-makan ke ja kar

hum apne ko un ki tegh kha kar miTa miTa kar bana chuke hain

yahi hain adna si ek ada se jinhon ne barham hai ki KHudai

yahi hain aksar qaza ke jin se farishte bhi zak uTha chuke hain

ye kah do bas maut se ho ruKHsat kyun nahaq aai hai us ki shamat

ki dar talak wo masih-KHaslat meri ayaadat ko aa chuke hain

jo baat mane to ain shafqat na mane to ain husn-e-KHubi

'rasa' bhala hum ko daKHl kya ab hum apni haalat suna chuke hain