fasahaton par agar inhisar hone lage

fasāhatoñ par agar inhisār hone lage

mirā suḳhan bhī adab meñ shumār hone lage

maiñ qaul-o-fe’l meñ yaksāniyat kā tālib huuñ

har ek lafz mirā e'tibār hone lage

sukūn-e-dā.imī miltā hai qalb-e-muztar ko

kisī ke dard meñ jab ġham-gusār hone lage

kise ḳhabar thī ki jo log the harīs-e-nashāt

ab un ko dekh ke ġham āshkār hone lage

sirāt-e-haq pe jo insāniyat ko ek kare

us ek qaum ke TukḌe hazār hone lage

usī se nik.hat-e-hastī jahān meñ phaile

ki jis kā 'ashraf'-o-ā'lā shi'ār hone lage

fasahaton par agar inhisar hone lage

mera suKHan bhi adab mein shumar hone lage

main qaul-o-fe’l mein yaksaniyat ka talib hun

har ek lafz mera e'tibar hone lage

sukun-e-daimi milta hai qalb-e-muztar ko

kisi ke dard mein jab gham-gusar hone lage

kise KHabar thi ki jo log the haris-e-nashat

ab un ko dekh ke gham aashkar hone lage

siraat-e-haq pe jo insaniyat ko ek kare

us ek qaum ke TukDe hazar hone lage

usi se nikhat-e-hasti jahan mein phaile

ki jis ka 'ashraf'-o-a'la shi'ar hone lage