fasana-e-gham-e-jaanan kisi pe bar nahin

fasāna-e-ġham-e-jānāñ kisī pe baar nahīñ

ab apne dil ke sivā koī rāzdār nahīñ

mirī nigāh kī rif'at pe hai madār us kā

tirī adā pe mohabbat kā inhisār nahīñ

badal na jaa.e kahīñ mere e'timād kā ruḳh

vo mo'tabar hai yahāñ jis kā e'tibār nahīñ

ik aisā jaam idhar bhī bahār ke saaqī

ba-qadr-e-zarf abhī tak mujhe ḳhumār nahīñ

ba-zid hai aaj jahāñ ko tabāh karne par

ye aadmī ki jise koī iḳhtiyār nahīñ

kuchh is tarah se huī hai chaman kī nashv-o-numā

mirī nigāh kī had tak kahīñ bahār nahīñ

ḳhizāñ-nasīb haiñ ab tak fazā.eñ gulshan kī

chaman ke zarf meñ gunjā.ish-e-bahār nahīñ

fazā.eñ guuñj uTheñgī mire tarānoñ se

ḳhamosh huuñ ki abhī mausam-e-bahār nahīñ

mizāj dil kā samajh meñ na aa sakā 'maikash'

ḳhushī bhī raas nahīñ ġham bhī sāzgār nahīñ

fasana-e-gham-e-jaanan kisi pe bar nahin

ab apne dil ke siwa koi raazdar nahin

meri nigah ki rif'at pe hai madar us ka

teri ada pe mohabbat ka inhisar nahin

badal na jae kahin mere e'timad ka ruKH

wo mo'tabar hai yahan jis ka e'tibar nahin

ek aisa jam idhar bhi bahaar ke saqi

ba-qadr-e-zarf abhi tak mujhe KHumar nahin

ba-zid hai aaj jahan ko tabah karne par

ye aadmi ki jise koi iKHtiyar nahin

kuchh is tarah se hui hai chaman ki nashw-o-numa

meri nigah ki had tak kahin bahaar nahin

KHizan-nasib hain ab tak fazaen gulshan ki

chaman ke zarf mein gunjaish-e-bahaar nahin

fazaen gunj uThengi mere taranon se

KHamosh hun ki abhi mausam-e-bahaar nahin

mizaj dil ka samajh mein na aa saka 'maikash'

KHushi bhi ras nahin gham bhi sazgar nahin