fasana-e-sitam-e-kaenat kahte hain

fasāna-e-sitam-e-kā.enāt kahte haiñ

ye ashk-e-ġham to mire dil kī baat kahte haiñ

vahī nigāh ki jis se jahāñ laraztā hai

ham us nigāh ko rāz-e-hayāt kahte haiñ

tulū-e-mehr-e-mubīñ tak nazar nahīñ jaatī

jo be-ḳhabar haiñ vo din ko bhī raat kahte haiñ

gul-o-bahār kā anjām hai jinheñ ma.alūm

chaman ko dām-gah-e-hādsāt kahte haiñ

ham ahl-e-ishq haiñ 'shā.ir' hameñ ye hosh kahāñ

kise itaab kise iltifāt kahte haiñ

fasana-e-sitam-e-kaenat kahte hain

ye ashk-e-gham to mere dil ki baat kahte hain

wahi nigah ki jis se jahan larazta hai

hum us nigah ko raaz-e-hayat kahte hain

tulu-e-mehr-e-mubin tak nazar nahin jati

jo be-KHabar hain wo din ko bhi raat kahte hain

gul-o-bahaar ka anjam hai jinhen malum

chaman ko dam-gah-e-hadsat kahte hain

hum ahl-e-ishq hain 'shair' hamein ye hosh kahan

kise itab kise iltifat kahte hain