فسانے جاں نوردی کے رقم ہوتے رہیں گے

فسانے جاں نوردی کے رقم ہوتے رہیں گے

سو ہم جیسوں کے یوںہی سر قلم ہوتے رہیں گے

تمہارا ہجر مرجھا دے گا ہم جیسوں کو لیکن

تمہاری یاد سے ہم تازہ دم ہوتے رہیں گے

بہت روتے رہیں گے ہم بھی ان کی اک نظر کو

مگر اوروں پہ ہی ان کے کرم ہوتے رہیں گے

یوںہی قائم رہے گی رونق محفل تمہاری

یوںہی پیدا یہاں پر اہل غم ہوتے رہیں گے

یوں ہی کرتے رہیں گے روز و شب ہم غم گساری

غم دوراں غم ہجراں بہم ہوتے رہیں گے

تمہاری ناز برداری کو یوں ہی شاہزادی

ہم ایسے شاہزادوں کے جنم ہوتے رہیں گے

دریبؔ اس محفل دنیا میں کچھ ہو یا نہیں ہو

ہمارے تذکرے تو بیش و کم ہوتے رہیں گے