fasil-e-shahr-e-ana mein shigaf maine kiya

fasīl-e-shahr-e-anā meñ shigāf maiñ ne kiyā

ye kār-nāma ḳhud apne ḳhilāf maiñ ne kiyā

mirā ġhulām batātā thā ḳhud ko jo har dam

bigaḌ gayā jo zarā iḳhtilāf maiñ ne kiyā

tumhāre husn kā charchā karūñgā pariyoñ meñ

agar kabhī safar-e-koh-e-qāf maiñ ne kiyā

bas ek tere ta'alluq kī pāsdārī meñ

tamām shahr ko apne ḳhilāf maiñ ne kiyā

mujhe ḳhabar hai kahīñ kā bhī rah na pā.ūñgā

tirī razā se agar inhirāf maiñ ne kiyā

vahī kahā hai jo mā'lūm hai zamāne ko

kahāñ 'shakīl' koī inkishāf maiñ ne kiyā

fasil-e-shahr-e-ana mein shigaf main ne kiya

ye kar-nama KHud apne KHilaf main ne kiya

mera ghulam batata tha KHud ko jo har dam

bigaD gaya jo zara iKHtilaf main ne kiya

tumhaare husn ka charcha karunga pariyon mein

agar kabhi safar-e-koh-e-qaf main ne kiya

bas ek tere ta'alluq ki pasdari mein

tamam shahr ko apne KHilaf main ne kiya

mujhe KHabar hai kahin ka bhi rah na paunga

teri raza se agar inhiraf main ne kiya

wahi kaha hai jo ma'lum hai zamane ko

kahan 'shakil' koi inkishaf main ne kiya