fasil-e-zat par itra raha hun

fasīl-e-zāt par itrā rahā huuñ

zamāne se bichhaḌtā jā rahā huuñ

maiñ patthar ke na.e paikar banā kar

ba-shakl-e-mom Dhaltā jā rahā huuñ

vo ik chehra vo palkeñ aur tabassum

ġhazal ko us kī lai pe gā rahā huuñ

tasavvur meñ kisī se baat kar ke

lab-o-lahje pe us ke chhā rahā huuñ

uḌānoñ se abhī ġhāfil huuñ apnī

zamīñ ko āsmāñ batlā rahā huuñ

muamma ban ga.ī hai zindagī ab

maiñ uljhī zulf ko suljhā rahā huuñ

abhī us gaañv meñ mele lageñge

abhī jis gaañv par mañDlā rahā huuñ

shanāsā.ī huī ḳhāroñ se itnī

guloñ ko dekh kar ghabrā rahā huuñ

maiñ lafzoñ meñ hasīñ rūmān lā kar

na.e lahje meñ Dhaltā jā rahā huuñ

vahī hai vasl kī jhūTī tasallī

maiñ 'aslam' ruuh ko taḌpā rahā huuñ

fasil-e-zat par itra raha hun

zamane se bichhaDta ja raha hun

main patthar ke nae paikar bana kar

ba-shakl-e-mom Dhalta ja raha hun

wo ek chehra wo palken aur tabassum

ghazal ko us ki lai pe ga raha hun

tasawwur mein kisi se baat kar ke

lab-o-lahje pe us ke chha raha hun

uDanon se abhi ghafil hun apni

zamin ko aasman batla raha hun

muamma ban gai hai zindagi ab

main uljhi zulf ko suljha raha hun

abhi us ganw mein mele lagenge

abhi jis ganw par manDla raha hun

shanasai hui KHaron se itni

gulon ko dekh kar ghabra raha hun

main lafzon mein hasin ruman la kar

nae lahje mein Dhalta ja raha hun

wahi hai wasl ki jhuTi tasalli

main 'aslam' ruh ko taDpa raha hun