فصل گل آئی مگر چاک گریباں نہ ہوئے

فصل گل آئی مگر چاک گریباں نہ ہوئے

لوگ تھے اتنے پریشاں کہ پریشاں نہ ہوئے

بس یوں ہی بڑھتی رہی بڑھتی رہی تاریکی

اور کچھ صبح کے آثار نمایاں نہ ہوئے

ہم بھی آوارہ ہی پھرتے ہیں صبا کی مانند

ہم بھی منت‌‌ کش ارباب گلستاں نہ ہوئے

تیری آواز کسی نے نہ سنی ہو جیسے

ہم تری بزم میں جس دن سے غزل خواں نہ ہوئے

جس قدر آج پریشان ہے ہر اہل نظر

اس قدر تو ترے گیسو بھی پریشاں نہ ہوئے

کب ہوا ہم کو غم تیرہ شبی اے نشترؔ

ان کی یادوں کے دئے کب سر مژگاں نہ ہوئے