fasl-e-gul fasl-e-KHizan jo bhi ho KHush-dil rahiye

fasl-e-gul fasl-e-ḳhizāñ jo bhī ho ḳhush-dil rahiye

koī mausam ho har ik rañg meñ kāmil rahiye

mauj o girdāb o talātum kā taqāzā hai kuchh aur

rahiye mohtāt to bas tā-lab-e-sāhil rahiye

dekhte rahiye ki ho jaa.e na kam shān-e-junūñ

aa.ina ban ke ḳhud apne hī muqābil rahiye

un kī nazroñ ke sivā sab kī nigāheñ uTThīñ

mahfil-e-yār meñ bhī zīnat-e-mahfil rahiye

dil pe har haal meñ hai sohbat-e-nā-jins harām

haif-sad-haif ki nā-jinsoñ meñ shāmil rahiye

daaġh siine kā dahaktā rahe jaltā rahe dil

raat baaqī hai jahāñ tak mah-e-kāmil rahiye

jāniye daulat-e-kaunain ko bhī jins-e-haqīr

aur dar-e-yār pe ik bose ke saa.il rahiye

āshiqī sheva-e-rindān-e-balā-kash hai miyāñ

vaj.h-e-shā.istagī-e-ḳhanjar-e-qātil rahiye

fasl-e-gul fasl-e-KHizan jo bhi ho KHush-dil rahiye

koi mausam ho har ek rang mein kaamil rahiye

mauj o girdab o talatum ka taqaza hai kuchh aur

rahiye mohtat to bas ta-lab-e-sahil rahiye

dekhte rahiye ki ho jae na kam shan-e-junun

aaina ban ke KHud apne hi muqabil rahiye

un ki nazron ke siwa sab ki nigahen uTThin

mahfil-e-yar mein bhi zinat-e-mahfil rahiye

dil pe har haal mein hai sohbat-e-na-jins haram

haif-sad-haif ki na-jinson mein shamil rahiye

dagh sine ka dahakta rahe jalta rahe dil

raat baqi hai jahan tak mah-e-kaamil rahiye

jaaniye daulat-e-kaunain ko bhi jins-e-haqir

aur dar-e-yar pe ek bose ke sail rahiye

aashiqi shewa-e-rindan-e-bala-kash hai miyan

wajh-e-shaistagi-e-KHanjar-e-qatil rahiye