فصل گل کی ہے آبرو ہم سے

فصل گل کی ہے آبرو ہم سے

ہم سے ہے سیل رنگ و بو ہم سے

حسن فطرت کے رازدار ہیں ہم

پھول کرتے ہیں گفتگو ہم سے

فرش گل پر بوقت صبح نسیم

آ کے ملتی ہے با وضو ہم سے

ہم شہید غم و الم ہی سہی

زندگی تو ہے سرخ رو ہم سے

نام ساقی کا ہو گیا ورنہ

مے کدہ میں ہے ہا و ہو ہم سے

بزم رنداں میں اب بھی باقی ہے

وقعت بادہ و سبو ہم سے

ہم سے ہے دردؔ و داغؔ کی عظمت

ہم سے ہے نام آرزوؔ ہم سے

سیکھنا ہو تو سیکھ لے منشاؔ

کوئی انداز جستجو ہم سے