fasl-e-gul ki hai aabru humse

fasl-e-gul kī hai aabrū ham se

ham se hai sail-e-rañg-o-bū ham se

husn-e-fitrat ke rāzdār haiñ ham

phuul karte haiñ guftugū ham se

farsh gul par ba-vaqt-e-sub.h-e-nasīm

aa ke miltī hai bā-vazū ham se

ham shahīd-e-ġham-o-alam hī sahī

zindagī to hai surḳh-rū ham se

naam saaqī kā ho gayā varna

mai-kade meñ hai hā-o-hū ham se

bazm-e-rindāñ meñ ab bhī baaqī hai

vaq.at-e-bāda-o-subū ham se

ham se hai 'dard'-o-'dāġh' kī azmat

ham se hai nām-e-'ārzū' ham se

sīkhnā ho to siikh le 'manshā'

koī andāz-e-justujū ham se

fasl-e-gul ki hai aabru hum se

hum se hai sail-e-rang-o-bu hum se

husn-e-fitrat ke raazdar hain hum

phul karte hain guftugu hum se

farsh gul par ba-waqt-e-subh-e-nasim

aa ke milti hai ba-wazu hum se

hum shahid-e-gham-o-alam hi sahi

zindagi to hai surKH-ru hum se

nam saqi ka ho gaya warna

mai-kade mein hai ha-o-hu hum se

bazm-e-rindan mein ab bhi baqi hai

waqat-e-baada-o-subu hum se

hum se hai 'dard'-o-'dagh' ki azmat

hum se hai nam-e-'arzu' hum se

sikhna ho to sikh le 'mansha'

koi andaz-e-justuju hum se