fasl-e-junun mein daman-o-dil chaak bhi nahin

fasl-e-junūñ meñ dāman-o-dil chaak bhī nahīñ

kyā dasht hai ki uḌtī kahīñ ḳhaak bhī nahīñ

jiinā tirā muhāl to honā hī thā ki tū

is daur ke hisāb se chālāk bhī nahīñ

raqs-e-junūñ to ḳhair baḌī baat hai magar

ab shahr meñ numā.ish-e-idrāk bhī nahīñ

achchhā huā ki jald hī tū ne utaar dī

jachtī hai sab pe dard kī poshāk bhī nahīñ

dariyā kujā ki tishna-laboñ ke liye to ab

raste meñ koī dīda-e-namnāk bhī nahīñ

vo din bhī the ki aañkh bichhāte the barg-o-gul

ab mujh pe multafit ḳhas-o-ḳhāshāk bhī nahīñ

dhul jaa.eñ jis ke lams se dil kī kasāfateñ

bāñhoñ meñ vo tirā badan-e-pāk bhī nahīñ

kyuuñ sogvār ab bhī hai marg-e-zamīr par

vo vāqi.a thā utnā alamnāk bhī nahīñ

ik 'umr se kināra-e-be-chāragī pe huuñ

dariyā chaḌhā hai aur maiñ tairāk bhī nahīñ

kyuuñ ḳhushk ho gayā shajr-e-ārzū 'salīm'

mausam thā jabki ziist kā saffāk bhī nahīñ

fasl-e-junun mein daman-o-dil chaak bhi nahin

kya dasht hai ki uDti kahin KHak bhi nahin

jina tera muhaal to hona hi tha ki tu

is daur ke hisab se chaalak bhi nahin

raqs-e-junun to KHair baDi baat hai magar

ab shahr mein numaish-e-idrak bhi nahin

achchha hua ki jald hi tu ne utar di

jachti hai sab pe dard ki poshak bhi nahin

dariya kuja ki tishna-labon ke liye to ab

raste mein koi dida-e-namnak bhi nahin

wo din bhi the ki aankh bichhate the barg-o-gul

ab mujh pe multafit KHas-o-KHashak bhi nahin

dhul jaen jis ke lams se dil ki kasafaten

banhon mein wo tera badan-e-pak bhi nahin

kyun sogwar ab bhi hai marg-e-zamir par

wo waqia tha utna alamnak bhi nahin

ek 'umr se kinara-e-be-chaaragi pe hun

dariya chaDha hai aur main tairak bhi nahin

kyun KHushk ho gaya shajr-e-arzu 'salim'

mausam tha jabki zist ka saffak bhi nahin