fasurda-dil hain KHushi se bichhaD gae hain log

fasurda-dil haiñ ḳhushī se bichhaḌ ga.e haiñ log

ḳhudā ko bhuul ke mushkil meñ paḌ ga.e haiñ log

ġham aur dard ke jangal uge haiñ chehroñ par

na.e zamāne meñ kitne ujaḌ ga.e haiñ log

sitam kī āñdhī ne mismār kar diyā in ko

ye lag rahā hai jaḌoñ se ukhaḌ ga.e haiñ log

najāt kī koī sūrat nazar nahīñ aatī

dukhoñ ke phande meñ aise jakaḌ ga.e haiñ log

the rāh-e-rāst pe jab tak paḌe the pastī meñ

bulandiyoñ pe pahuñch kar bigaḌ ga.e haiñ log

bhulā diye haiñ ḳhulūs-o-vafā ke saare sabaq

mafād ḳhatre meñ aayā to laḌ ga.e haiñ log

ajiib chiiz anā kā ḳhumār bhī hai 'kamāl'

nihatte ho ke bhī maidāñ meñ aḌ ga.e haiñ log

fasurda-dil hain KHushi se bichhaD gae hain log

KHuda ko bhul ke mushkil mein paD gae hain log

gham aur dard ke jangal uge hain chehron par

nae zamane mein kitne ujaD gae hain log

sitam ki aandhi ne mismar kar diya in ko

ye lag raha hai jaDon se ukhaD gae hain log

najat ki koi surat nazar nahin aati

dukhon ke phande mein aise jakaD gae hain log

the rah-e-rast pe jab tak paDe the pasti mein

bulandiyon pe pahunch kar bigaD gae hain log

bhula diye hain KHulus-o-wafa ke sare sabaq

mafad KHatre mein aaya to laD gae hain log

ajib chiz ana ka KHumar bhi hai 'kamal'

nihatte ho ke bhi maidan mein aD gae hain log