fasurda lakh ho dil shoala-samani nahin jati

fasurda laakh ho dil sho.ala-sāmānī nahīñ jaatī

sukūñ meñ bhī mire dariyā kī tuġhyānī nahīñ jaatī

dam-e-nazzāra bhī apnī pareshānī nahīñ jaatī

bikhar jaate haiñ jalve shakl pahchānī nahīñ jaatī

dil-e-sāda meñ o zauq-e-mohabbat baḳhshne vaale

abhī tak terī baḳhshish kī gul-afshānī nahīñ jaatī

abhī tak pai-ba-pai nākāmiyoñ se dil nahīñ thaktā

abhī tak ārzūoñ kī farāvānī nahīñ jaatī

na jaane kis nazar se tujh ko kis aalam meñ kab dekhā

ki ab tak dīda-e-hairāñ kī hairānī nahīñ jaatī

'sabā' ne gudgudāyā kuchh nasīm-e-sub.h ne chheḌā

'mubārak' phir bhī gul kī pāk-dāmānī nahīñ jaatī

fasurda lakh ho dil shoala-samani nahin jati

sukun mein bhi mere dariya ki tughyani nahin jati

dam-e-nazzara bhi apni pareshani nahin jati

bikhar jate hain jalwe shakl pahchani nahin jati

dil-e-sada mein o zauq-e-mohabbat baKHshne wale

abhi tak teri baKHshish ki gul-afshani nahin jati

abhi tak pai-ba-pai nakaamiyon se dil nahin thakta

abhi tak aarzuon ki farawani nahin jati

na jaane kis nazar se tujh ko kis aalam mein kab dekha

ki ab tak dida-e-hairan ki hairani nahin jati

'saba' ne gudgudaya kuchh nasim-e-subh ne chheDa

'mubarak' phir bhi gul ki pak-damani nahin jati