fasurdagi ka mudawa karen to kaise karen

fasurdagī kā mudāvā kareñ to kaise kareñ

vo log jo tire qurb-e-jamāl se bhī Dareñ

ik aisī raah pe Daalā hai tere ġham ne ki ham

kisī bhī shakl ko dekheñ to ruk ke aah bhareñ

ye kyā ki be-sabab aa.e qazā javānī meñ

ye kyuuñ na ho ki tumhārī kisī adā pe mareñ

shab-e-alam ke bhī hote haiñ kuchh na kuchh ādāb

taḌapne vaale sahar tak to intizār kareñ

us ek baat ke ba.ad ab hazār baat karo

ye dil ke zaḳhm haiñ yaaro bhareñ bhareñ na bhareñ

subūt-e-ishq kī ye bhī to ek sūrat hai

ki jis se pyaar kareñ us pe tohmateñ bhī dhareñ

kuchh aise dost bhī merī nigāh meñ haiñ 'qatīl'

ki mujh ko baaz rakheñ jis se ḳhud usī pe mareñ

fasurdagi ka mudawa karen to kaise karen

wo log jo tere qurb-e-jamal se bhi Daren

ek aisi rah pe Dala hai tere gham ne ki hum

kisi bhi shakl ko dekhen to ruk ke aah bharen

ye kya ki be-sabab aae qaza jawani mein

ye kyun na ho ki tumhaari kisi ada pe maren

shab-e-alam ke bhi hote hain kuchh na kuchh aadab

taDapne wale sahar tak to intizar karen

us ek baat ke baad ab hazar baat karo

ye dil ke zaKHm hain yaro bharen bharen na bharen

subut-e-ishq ki ye bhi to ek surat hai

ki jis se pyar karen us pe tohmaten bhi dharen

kuchh aise dost bhi meri nigah mein hain 'qatil'

ki mujh ko baz rakhen jis se KHud usi pe maren