fasurdagi nahin barbaadi-e-jahan se hamein

fasurdagī nahīñ barbādī-e-jahāñ se hameñ

isī zamīñ ko badalnā hai āsmāñ se hameñ

milā ye faiz ġham-e-ishq-e-jāvedāñ se hameñ

najāt ho ga.ī āḳhir ġham-e-jahāñ se hameñ

tarīq-e-ishq meñ rahbar huī hai gumrāhī

milā hai bām-e-yaqīñ zīna-e-gumāñ se hameñ

isī kī ḳhaak se phir āshiyāñ banā leñge

malāl kuchh nahīñ taḳhrīb-e-āshiyāñ se hameñ

shikasta naav ko maujoñ meñ ḳhud hī khenā hai

na nāḳhudā se ġharaz hai na bādbāñ se hameñ

hamārī tez-ḳhirāmī kā saath de na sake

gila hai sustī-e-raftār-e-ham-rahāñ se hameñ

tujhī se be-ḳhudī-e-shauq pūchhte haiñ batā

ḳhabar nahīñ ki kahāñ le ga.ī kahāñ se hameñ

hai ishq hī ke liye ham ko ishq kā saudā

ġharaz na suud se matlab na kuchh ziyāñ se hameñ

jabīñ kahīñ bhī jhuke dil jhukā hai us kī taraf

ajiib rabt hai us sang-e-āstāñ se hameñ

sukūñ hai kunj-e-qafas meñ na āshiyāñ meñ hai chain

amaañ kahīñ bhī nahīñ barq-e-be-amāñ se hameñ

jafā-e-dost ne itnā kiyā hai ḳhūgar-e-ġham

ki ḳhauf kuchh na rahā jaur-e-dushmanāñ se hameñ

har ek harf-e-mohabbat pe bad-gumānī hai

paḌā hai sābiqa ik yār-e-nukta-dāñ se hameñ

na jaane kis kī tajallī kī muntazir hai nigāh

farār mil na sakā jalva-e-butāñ se hameñ

ga.ī bahār to mausam pe iḳhtiyār thā kyā

chaman meñ jī ko lagānā paḌā ḳhizāñ se hameñ

baġhair jumbish-e-abrū idhar nigāh uThī

qatīl-e-nāz kiyā tīr-e-be-kamāñ se hameñ

talab thī ḳhum kī milā sirf ek jām-e-tahī

muaaf pīr-e-muġhāñ rakh is armuġhāñ se hameñ

hanūz qāfile meñ intishār baaqī hai

gila abas hai 'valī' mīr-e-kārvāñ se hameñ

fasurdagi nahin barbaadi-e-jahan se hamein

isi zamin ko badalna hai aasman se hamein

mila ye faiz gham-e-ishq-e-jawedan se hamein

najat ho gai aaKHir gham-e-jahan se hamein

tariq-e-ishq mein rahbar hui hai gumrahi

mila hai baam-e-yaqin zina-e-guman se hamein

isi ki KHak se phir aashiyan bana lenge

malal kuchh nahin taKHrib-e-ashiyan se hamein

shikasta naw ko maujon mein KHud hi khena hai

na naKHuda se gharaz hai na baadban se hamein

hamari tez-KHirami ka sath de na sake

gila hai susti-e-raftar-e-ham-rahan se hamein

tujhi se be-KHudi-e-shauq puchhte hain bata

KHabar nahin ki kahan le gai kahan se hamein

hai ishq hi ke liye hum ko ishq ka sauda

gharaz na sud se matlab na kuchh ziyan se hamein

jabin kahin bhi jhuke dil jhuka hai us ki taraf

ajib rabt hai us sang-e-astan se hamein

sukun hai kunj-e-qafas mein na aashiyan mein hai chain

aman kahin bhi nahin barq-e-be-aman se hamein

jafa-e-dost ne itna kiya hai KHugar-e-gham

ki KHauf kuchh na raha jaur-e-dushmanan se hamein

har ek harf-e-mohabbat pe bad-gumani hai

paDa hai sabiqa ek yar-e-nukta-dan se hamein

na jaane kis ki tajalli ki muntazir hai nigah

farar mil na saka jalwa-e-butan se hamein

gai bahaar to mausam pe iKHtiyar tha kya

chaman mein ji ko lagana paDa KHizan se hamein

baghair jumbish-e-abru idhar nigah uThi

qatil-e-naz kiya tir-e-be-kaman se hamein

talab thi KHum ki mila sirf ek jam-e-tahi

muaf pir-e-mughan rakh is armughan se hamein

hanuz qafile mein intishaar baqi hai

gila abas hai 'wali' mir-e-karwan se hamein