fath pane ki nai rah nikali usne

fat.h paane kī na.ī raah nikālī us ne

merā sar maañg liyā ban ke savālī us ne

apnī hī zaat ke gulshan meñ kiyā aa ke qiyām

bhuul kar vādī-e-kashmīr-o-manālī us ne

qurb māñgā to diyā hijr jo māñgā to diyā

jo kahā maiñ ne koī baat na Taalī us ne

maiñ samajhtā thā yūñhī hogā hunar us kā magar

be misālī kī bhī tasvīr banā lī us ne

sang-zādoñ meñ shab-o-roz the us ke lekin

zindagī phuul ke pairā.e meñ Dhālī us ne

baad muddat ke huā sāmnā us se jo mirā

dūsrī samt nazar apnī ghumā lī us ne

dū-badū jab maiñ huā zillat-o-rusvā.ī se

kī atā mansab-e-izzat pe bahālī us ne

is qadar saada tabī.at hai mirā yaar ki bas

jo chhupānī thī vahī baat uchhālī us ne

jaane kis manzar-e-sad-rang meñ gum thā vo 'mujīb'

koī shai dekhī nahīñ dekhne vaalī us ne

fath pane ki nai rah nikali us ne

mera sar mang liya ban ke sawali us ne

apni hi zat ke gulshan mein kiya aa ke qiyam

bhul kar wadi-e-kashmir-o-manali us ne

qurb manga to diya hijr jo manga to diya

jo kaha main ne koi baat na Tali us ne

main samajhta tha yunhi hoga hunar us ka magar

be misali ki bhi taswir bana li us ne

sang-zadon mein shab-o-roz the us ke lekin

zindagi phul ke pairae mein Dhaali us ne

baad muddat ke hua samna us se jo mera

dusri samt nazar apni ghuma li us ne

du-badu jab main hua zillat-o-ruswai se

ki ata mansab-e-izzat pe bahaali us ne

is qadar sada tabiat hai mera yar ki bas

jo chhupani thi wahi baat uchhaali us ne

jaane kis manzar-e-sad-rang mein gum tha wo 'mujib'

koi shai dekhi nahin dekhne wali us ne