faza dushwar-e-jaan ho to mohabbat aur baDhti hai

fazā dushvār-e-jāñ ho to mohabbat aur baḌhtī hai

koī jab rāsta roke to himmat aur baḌhtī hai

gile-shikve chalo mil baiTh kar sab duur ham kar leñ

nigāheñ pher lene se kudūrat aur baḌhtī hai

hamārā mashvara ahl-e-jahāñ ko raas kyoñ aa.e

burā jab vaqt hotā hai himāqat aur baḌhtī hai

kisī mazlūm ke haq meñ kabhī sach bol kar dekho

har ik insān kī nazroñ meñ 'izzat aur baḌhtī hai

hameñ āgāh kartā hai hamesha hī burā.ī se

ḳhilāf-e-qalb jaane par nadāmat aur baḌhtī hai

yuuñ kahne ko hazāroñ log kahte haiñ ġhazal lekin

salīqe se kahī jaa.e to shohrat aur baḌhtī hai

ḳhamoshī buzdilī kī hai 'alāmat is liye 'sāhil'

'adū ke zulm Dhāne kī jasārat aur baḌhtī hai

faza dushwar-e-jaan ho to mohabbat aur baDhti hai

koi jab rasta roke to himmat aur baDhti hai

gile-shikwe chalo mil baiTh kar sab dur hum kar len

nigahen pher lene se kudurat aur baDhti hai

hamara mashwara ahl-e-jahan ko ras kyon aae

bura jab waqt hota hai himaqat aur baDhti hai

kisi mazlum ke haq mein kabhi sach bol kar dekho

har ek insan ki nazron mein 'izzat aur baDhti hai

hamein aagah karta hai hamesha hi burai se

KHilaf-e-qalb jaane par nadamat aur baDhti hai

yun kahne ko hazaron log kahte hain ghazal lekin

saliqe se kahi jae to shohrat aur baDhti hai

KHamoshi buzdili ki hai 'alamat is liye 'sahil'

'adu ke zulm Dhane ki jasarat aur baDhti hai