faza-e-alam-e-qudsi mein hai nashw-o-numa meri

fazā-e-ālam-e-qudsī meñ hai nashv-o-numā merī

mukāfāt-e-amal se duur hai bīm-o-rajā merī

sharī.at hai azal se mohr-e-paimān-e-vafā merī

tarīqat ḳhātim-e-ehrām-e-taslīm-o-razā merī

haqīqat hai savād-e-ḳhātir-e-be-mudda.ā merī

harīm-e-ma.arifat-da.a mā-kadar ḳhud nā-safā merī

tirī zāt-e-muqaddas hai mubarrā shirk-e-ġhairī se

ki nūr-e-zāt meñ sāya-sifat hastī hai lā merī

jamāl-e-lā-yazālī shash-jihat se rūnumā dekhā

banī ā.īna-dār-e-husn chashm-e-haq-numā merī

kisī kā husn tūr-afroz mahv-e-lan-tarānī hai

dalīl nīstī hai hastī-e-ishq-o-fanā merī

shuhūd-e-haq hai mā-bain-e-ġhuyūb ik jalva-e-qudrat

hayāt-e-jāvidāñ hai ibtidā aur intihā merī

azal se mahv-e-dīdār-e-jamāl-e-jalva-ārā huuñ

nazar bil-ġhair ho gar ho nazar meñ mā-sivā merī

hadīs-e-ishq bālā-tar hai harf-o-saut se 'sāhir'

kahāñ maiñ aur kahāñ taqdīr-e-fikr-e-nā-rasā merī

faza-e-alam-e-qudsi mein hai nashw-o-numa meri

mukafat-e-amal se dur hai bim-o-raja meri

shariat hai azal se mohr-e-paiman-e-wafa meri

tariqat KHatim-e-ehram-e-taslim-o-raza meri

haqiqat hai sawad-e-KHatir-e-be-muddaa meri

harim-e-marifat-da ma-kadar KHud na-safa meri

teri zat-e-muqaddas hai mubarra shirk-e-ghairi se

ki nur-e-zat mein saya-sifat hasti hai la meri

jamal-e-la-yazali shash-jihat se runuma dekha

bani aaina-dar-e-husn chashm-e-haq-numa meri

kisi ka husn tur-afroz mahw-e-lan-tarani hai

dalil nisti hai hasti-e-ishq-o-fana meri

shuhud-e-haq hai ma-bain-e-ghuyub ek jalwa-e-qudrat

hayat-e-jawidan hai ibtida aur intiha meri

azal se mahw-e-didar-e-jamal-e-jalwa-ara hun

nazar bil-ghair ho gar ho nazar mein ma-siwa meri

hadis-e-ishq baala-tar hai harf-o-saut se 'sahir'

kahan main aur kahan taqdir-e-fikr-e-na-rasa meri