faza-e-ishq mein uDta hua hun tair main

fazā-e-ishq meñ uḌtā huā huuñ taa.ir maiñ

vo shāḳh-e-gul mirī manzil hai aur musāfir maiñ

mirā vajūd magar kā.enāt meñ gum hai

fasīl-e-jism ke andar rahī ba-zāhir maiñ

vo ek naam jo merā kabhī nahīñ hotā

us ek naam ko kyoñ sochtī huuñ āḳhir maiñ

maiñ chāhtī huuñ ki vo bevafā na kahlā.e

nibhā rahī huuñ mohabbat usī kī ḳhātir maiñ

ḳhud apne aap meñ jalne ko be-qarār sī huuñ

dayār-e-shab se guzarne lagī huuñ kyā phir maiñ

ye shā.irī mirī iz.hār-e-zāt hai 'shabnam'

kahāñ ke sher-o-adab aur kahāñ kī shā.ir maiñ

faza-e-ishq mein uDta hua hun tair main

wo shaKH-e-gul meri manzil hai aur musafir main

mera wajud magar kaenat mein gum hai

fasil-e-jism ke andar rahi ba-zahir main

wo ek nam jo mera kabhi nahin hota

us ek nam ko kyon sochti hun aaKHir main

main chahti hun ki wo bewafa na kahlae

nibha rahi hun mohabbat usi ki KHatir main

KHud apne aap mein jalne ko be-qarar si hun

dayar-e-shab se guzarne lagi hun kya phir main

ye shairi meri izhaar-e-zat hai 'shabnam'

kahan ke sher-o-adab aur kahan ki shair main