faza-e-nam mein sadaon ka shor ho jae

fazā-e-nam meñ sadāoñ kā shor ho jaa.e

vo muskurā de zarā sā to bhor ho jaa.e

kabhī jo utrūñ maiñ raqs-e-suḳhan ke sahrā meñ

to apnā haal bhī mānind-e-mor ho jaa.e

vo mai-kade se bhī nikle to pāk-bāz rahe

maiñ us kī āñkhoñ se pī luuñ to shor ho jaa.e

nazar meñ phuul ho kāġhaz pe ek sahrā ho

to yuuñ ġhazal kā koī or-chhor ho jaa.e

jo fe.al-e-asl ko maiñ nazm karne baiThūñ to

badan se lahr uThe por por ho jaa.e

har ek raat vahī Dish ho zā.iqa bhī vahī

to phir mizāj-e-tarah-dār bor ho jaa.e

ye shāmiyāna suḳhan kā qarār-e-jāñ Thahrā

yahāñ qayām kare jo paTor ho jaa.e

murāqiba meñ koī aage chham se itrā.e

to phir faqīr ke dil meñ bhī chor ho jaa.e

magar ye dil ki kisī aur kā nahīñ rakhtā

dimāġh kahtā hai tū merī aur ho jaa.e

vo ik badan ki jo sar-chashma-e-tasavvur ho

to pā-barahna safar meñ bhī zor ho jaa.e

jo sun le 'qāsmī' terī ġhazal to patthar bhī

majāl hai ki vo itnā kaThor ho jaa.e

faza-e-nam mein sadaon ka shor ho jae

wo muskura de zara sa to bhor ho jae

kabhi jo utrun main raqs-e-suKHan ke sahra mein

to apna haal bhi manind-e-mor ho jae

wo mai-kade se bhi nikle to pak-baz rahe

main us ki aankhon se pi lun to shor ho jae

nazar mein phul ho kaghaz pe ek sahra ho

to yun ghazal ka koi or-chhor ho jae

jo feal-e-asl ko main nazm karne baiThun to

badan se lahr uThe por por ho jae

har ek raat wahi Dish ho zaiqa bhi wahi

to phir mizaj-e-tarah-dar bor ho jae

ye shamiyana suKHan ka qarar-e-jaan Thahra

yahan qayam kare jo paTor ho jae

muraqiba mein koi aage chham se itrae

to phir faqir ke dil mein bhi chor ho jae

magar ye dil ki kisi aur ka nahin rakhta

dimagh kahta hai tu meri aur ho jae

wo ek badan ki jo sar-chashma-e-tasawwur ho

to pa-barahna safar mein bhi zor ho jae

jo sun le 'qasmi' teri ghazal to patthar bhi

majal hai ki wo itna kaThor ho jae