faza-e-sehn-e-gulstan hai sogwar abhi

fazā-e-sehn-e-gulstāñ hai sogvār abhī

ḳhizāñ kī qaid meñ hai yūsuf-e-bahār abhī

abhī chaman pe chaman kā gumāñ nahīñ hotā

qabā-e-ġhuncha ko honā hai taar taar abhī

abhī hai ḳhanda-e-gul bhī agar to zer-e-labī

rukā rukā sā hai kuchh naġhma-e-hazār abhī

chaman to ḳhair chaman hai navā-garoñ ko nahīñ

ḳhud apnī shāḳh-e-nasheman pe iḳhtiyār abhī

abhī umiid kī sarsoñ kahīñ na phūlī

basant kā hai zamāne ko intizār abhī

tahī-subūī kisī kī ye kah rahī hai 'sharīf'

nizām-e-mai-kada badlegā ek baar abhī

faza-e-sehn-e-gulstan hai sogwar abhi

KHizan ki qaid mein hai yusuf-e-bahaar abhi

abhi chaman pe chaman ka guman nahin hota

qaba-e-ghuncha ko hona hai tar tar abhi

abhi hai KHanda-e-gul bhi agar to zer-e-labi

ruka ruka sa hai kuchh naghma-e-hazar abhi

chaman to KHair chaman hai nawa-garon ko nahin

KHud apni shaKH-e-nasheman pe iKHtiyar abhi

abhi umid ki sarson kahin na phuli

basant ka hai zamane ko intizar abhi

tahi-subui kisi ki ye kah rahi hai 'sharif'

nizam-e-mai-kada badlega ek bar abhi