faza ka zarra zarra ishq ki taswir tha kal shab jahan main tha

fazā kā zarra zarra ishq kī tasvīr thā kal shab jahāñ maiñ thā

maiñ ḳhud apnī nazar meñ sāhib-e-tauqīr thā kal shab jahāñ maiñ thā

jise dekhā vo dīvāna thā naqsh-e-dilnashīñ ke husn-e-ādil kā

jise sochā fanā ke rañg kī tafsīr thā kal shab jahāñ maiñ thā

mirā dil mere jis pahlū meñ raqsāñ thā usī pahlū meñ jannat thī

ye manzar chashm-e-vā ke ḳhvāb kī ta.abīr thā kal shab jahāñ maiñ thā

vo kyā lau thī ki jis kī ik kiran meñ sūrajoñ kī vus.ateñ gum thiiñ

mirā saarā jahāñ tanvīr hī tanvīr thā kal shab jahāñ maiñ thā

imārat jism kī mismār hotī jā rahī har nafas lekin

dil-e-vīrāñ ko zo.am-e-rif.at-e-ta.amīr thā kal shab jahāñ maiñ thā

havā ne ehtirām-e-mahfil-e-qudsī meñ apnā.ī ravish gul kī

fidā is ḳhāmushī par jauhar-e-taqrīr thā kal shab jahāñ maiñ thā

faza ka zarra zarra ishq ki taswir tha kal shab jahan main tha

main KHud apni nazar mein sahib-e-tauqir tha kal shab jahan main tha

jise dekha wo diwana tha naqsh-e-dilnashin ke husn-e-adil ka

jise socha fana ke rang ki tafsir tha kal shab jahan main tha

mera dil mere jis pahlu mein raqsan tha usi pahlu mein jannat thi

ye manzar chashm-e-wa ke KHwab ki tabir tha kal shab jahan main tha

wo kya lau thi ki jis ki ek kiran mein surajon ki wusaten gum thin

mera sara jahan tanwir hi tanwir tha kal shab jahan main tha

imarat jism ki mismar hoti ja rahi har nafas lekin

dil-e-viran ko zoam-e-rifat-e-tamir tha kal shab jahan main tha

hawa ne ehtiram-e-mahfil-e-qudsi mein apnai rawish gul ki

fida is KHamushi par jauhar-e-taqrir tha kal shab jahan main tha