faza mein shor-e-talatum ho rang-o-bu bhi ho

fazā meñ shor-e-talātum ho rang-o-bū bhī ho

zamīn-e-shahr-e-sitamgar lahū lahū bhī ho

har ik maqām maqām-e-sadā nahīñ hotā

ḳhamosh maiñ bhī rahūñ aur ḳhamosh tū bhī ho

fasīl-e-vahm-o-gumāñ ke nishān bhī na raheñ

mazā to jab hai kisī roz dū-badū bhī ho

hoñ manzileñ tere zer-e-qadam to lāzim hai

taḌap ho dil meñ koī ḳhaas justujū bhī ho

maiñ chāhtā huuñ vo merā rafīq ho jaa.e

vo dil se haath milā.e ye us meñ ḳhū bhī ho

haiñ muntazir ye havā.eñ ki dhajjiyāñ uḌ jaa.eñ

to apnā chāk-e-garebāñ kahīñ rafū bhī ho

yuuñ ashk aate haiñ āñkhoñ meñ diid se pahle

nigāh diid ke qābil ho bā-vazū bhī ho

faza mein shor-e-talatum ho rang-o-bu bhi ho

zamin-e-shahr-e-sitamgar lahu lahu bhi ho

har ek maqam maqam-e-sada nahin hota

KHamosh main bhi rahun aur KHamosh tu bhi ho

fasil-e-wahm-o-guman ke nishan bhi na rahen

maza to jab hai kisi roz du-badu bhi ho

hon manzilen tere zer-e-qadam to lazim hai

taDap ho dil mein koi KHas justuju bhi ho

main chahta hun wo mera rafiq ho jae

wo dil se hath milae ye us mein KHu bhi ho

hain muntazir ye hawaen ki dhajjiyan uD jaen

to apna chaak-e-gareban kahin rafu bhi ho

yun ashk aate hain aankhon mein did se pahle

nigah did ke qabil ho ba-wazu bhi ho