fazaon mein kuchh aisi khalbali thi

fazāoñ meñ kuchh aisī khalbalī thī

kaleja thaam kar vahshat chalī thī

kabhī us kī javānī manchalī thī

kabhī duniyā bhī sāñche meñ Dhalī thī

yahī ā.īna-dar-ā.īna ulfat

kabhī aks-e-ḳhafī naqsh-e-jalī thī

na chhoḌā sard jhoñkoñ ne vafā ko

jo shāḳh-e-dard kī tanhā kalī thī

bigāḌā kis ne hai tab-e-jahāñ ko

kabhī ye riñd-mashrab bhī valī thī

muhīt hañgāma-e-āfāq par hai

sadā-e-dard jo dil meñ palī thī

ġhanīmat jāniye phir nīm-raushan

charāġh-e-rāh se apnī galī thī

burā ho āgahī kā ziist varna

guzar jaatī burī thī yā bhalī thī

hamīñ ne 'fauq' chāhā zindagī ko

hamīñ se kisht-e-ġham phūlī-phalī thī

fazaon mein kuchh aisi khalbali thi

kaleja tham kar wahshat chali thi

kabhi us ki jawani manchali thi

kabhi duniya bhi sanche mein Dhali thi

yahi aaina-dar-aina ulfat

kabhi aks-e-KHafi naqsh-e-jali thi

na chhoDa sard jhonkon ne wafa ko

jo shaKH-e-dard ki tanha kali thi

bigaDa kis ne hai tab-e-jahan ko

kabhi ye rind-mashrab bhi wali thi

muhit hangama-e-afaq par hai

sada-e-dard jo dil mein pali thi

ghanimat jaaniye phir nim-raushan

charagh-e-rah se apni gali thi

bura ho aagahi ka zist warna

guzar jati buri thi ya bhali thi

hamin ne 'fauq' chaha zindagi ko

hamin se kisht-e-gham phuli-phali thi