kaba hai kabhi to kabhi but-KHana bana hai

ka.aba hai kabhī to kabhī but-ḳhāna banā hai

ye dil bhī ajab chiiz hai kyā kyā na banā hai

jis roz se dil aap kā dīvāna banā hai

ek lafz bhī niklā hai to afsāna banā hai

ye aaj kā din hashr kā din to nahīñ yārab

apnā thā jo kal tak vahī begāna banā hai

tinkoñ kā to bas naam hai sachchā.ī yahī hai

ik jehd-e-musalsal hai jo kāshāna banā hai

taḳhrīb ke parde meñ hī ta.amīr hai saaqī

shīsha koī pighlā hai to paimāna banā hai

takmīl-e-vafā hosh meñ mumkin hī nahīñ thā

dīvāna samajh buujh ke dīvāna banā hai

duniyā meñ koī mol na thā 'shauq' kā lekin

qismat hai jo sañg-e-dar-e-jānāna banā hai

kaba hai kabhi to kabhi but-KHana bana hai

ye dil bhi ajab chiz hai kya kya na bana hai

jis roz se dil aap ka diwana bana hai

ek lafz bhi nikla hai to afsana bana hai

ye aaj ka din hashr ka din to nahin yarab

apna tha jo kal tak wahi begana bana hai

tinkon ka to bas nam hai sachchai yahi hai

ek jehd-e-musalsal hai jo kashana bana hai

taKHrib ke parde mein hi tamir hai saqi

shisha koi pighla hai to paimana bana hai

takmil-e-wafa hosh mein mumkin hi nahin tha

diwana samajh bujh ke diwana bana hai

duniya mein koi mol na tha 'shauq' ka lekin

qismat hai jo sang-e-dar-e-jaanana bana hai