fida hai dil payambar par hamara

fidā hai dil payambar par hamārā

dilā hai auj par aḳhtar hamārā

tasavvur hai ruḳh-e-raushan kā dil meñ

munavvar āj-kal hai ghar hamārā

vasīla ham ko haath aaya hai bartar

shafī.a-e-hashr hai sarvar hamārā

ham ab maddāh-e-shāh-e-bahr-o-bar haiñ

musaḳhḳhar hogā bahr-o-bar hamārā

hameñ bīmārī-e-hijrāñ hai yā shaah

usī se haal hai abtar hamārā

paḌe haiñ hind meñ ham yā shah-e-dīñ

taḌaptā hai dil-e-muztar hamārā

na tāqat hai pahuñchne kī na hai sabr

muayyan hai koī nayyar hamārā

kashish bahr-e-ḳhudā ab kiije aisī

ki shauq-e-dil hī ho rahbar hamārā

vo sang-e-āstāñ aur ḳhaak vaañ kī

ye bālish aur vo bistar hamārā

yahī ḳhvāhish hai aur hai ye hī ummīd

yahī kaafī hai karr-o-far hamārā

atā farmā tavakkul aur qanā.at

bhaTaktā jaa.e ye dar dar hamārā

'fidā' apnī duā ho ye bhī maqbūl

dar-e-mahbūb ho aur sar hamārā

fida hai dil payambar par hamara

dila hai auj par aKHtar hamara

tasawwur hai ruKH-e-raushan ka dil mein

munawwar aaj-kal hai ghar hamara

wasila hum ko hath aaya hai bartar

shafia-e-hashr hai sarwar hamara

hum ab maddah-e-shah-e-bahr-o-bar hain

musaKHKHar hoga bahr-o-bar hamara

hamein bimari-e-hijran hai ya shah

usi se haal hai abtar hamara

paDe hain hind mein hum ya shah-e-din

taDapta hai dil-e-muztar hamara

na taqat hai pahunchne ki na hai sabr

muayyan hai koi nayyar hamara

kashish bahr-e-KHuda ab kije aisi

ki shauq-e-dil hi ho rahbar hamara

wo sang-e-astan aur KHak wan ki

ye baalish aur wo bistar hamara

yahi KHwahish hai aur hai ye hi ummid

yahi kafi hai karr-o-far hamara

ata farma tawakkul aur qanaat

bhaTakta jae ye dar dar hamara

'fida' apni dua ho ye bhi maqbul

dar-e-mahbub ho aur sar hamara