fikr-e-kaba kuchh hai kuchh hai shauq-e-but-KHana mujhe

fikr-e-ka.aba kuchh hai kuchh hai shauq-e-but-ḳhāna mujhe

dil bahalne ko hai kaafī bazm-e-rindāna mujhe

rang laa.ī hai mirī dīvāngī muddat ke baa'd

kah rahā hai aaj koī apnā dīvāna mujhe

nang-e-mai-ḳhāna samajh kar mujh ko bāhar kar diyā

yaad ab kyoñ kar rahā hai pīr-e-mai-ḳhāna mujhe

sham.a-rūoñ se nahīñ umīd-e-dād-e-soz-e-ishq

ye ġhanīmat hai samajh leñ apnā parvāna mujhe

ruḳh thā kā'be kī taraf uThte na the lekin qadam

shauq jaise khīñchtā ho sū-e-but-ḳhāna mujhe

vo mohabbat kī adā.eñ aur vo andāz-e-nazar

'umr bhar yaad aa.egā vo nāz-e-mastāna mujhe

tujh ko qassām-e-azal denā na thā ye ishq-e-ḳhām

kaash dil ke saath detā soz-e-parvāna mujhe

muddatoñ gardish meñ paimāna rahā mere liye

dekhtā hai aaj kis hasrat se paimāna mujhe

'zabt' ab kuchh hai umīd-e-irtiqā-e-zindagī

dil meñ aatā hai nazar phir rang-e-mai-ḳhāna mujhe

fikr-e-kaba kuchh hai kuchh hai shauq-e-but-KHana mujhe

dil bahalne ko hai kafi bazm-e-rindana mujhe

rang lai hai meri diwangi muddat ke ba'd

kah raha hai aaj koi apna diwana mujhe

nang-e-mai-KHana samajh kar mujh ko bahar kar diya

yaad ab kyon kar raha hai pir-e-mai-KHana mujhe

shama-ruon se nahin umid-e-dad-e-soz-e-ishq

ye ghanimat hai samajh len apna parwana mujhe

ruKH tha ka'be ki taraf uThte na the lekin qadam

shauq jaise khinchta ho su-e-but-KHana mujhe

wo mohabbat ki adaen aur wo andaz-e-nazar

'umr bhar yaad aaega wo naz-e-mastana mujhe

tujh ko qassam-e-azal dena na tha ye ishq-e-KHam

kash dil ke sath deta soz-e-parwana mujhe

muddaton gardish mein paimana raha mere liye

dekhta hai aaj kis hasrat se paimana mujhe

'zabt' ab kuchh hai umid-e-irtiqa-e-zindagi

dil mein aata hai nazar phir rang-e-mai-KHana mujhe