fikr ke dhage mein lafzon ko piro dene ke baad

fikr ke dhāge meñ lafzoñ ko piro dene ke baad

maiñ vo shā.ir huuñ jo hañs detā hai ro dene ke baad

hausla to dekhiye aa.e ayādat ke liye

yaar merī pusht meñ ḳhanjar chubho dene ke baad

yaañ nahīñ to vaañ khulegā raaz mere qatl kā

bach nahīñ sakte lahū ke daaġh dho dene ke baad

chhoḌne vaale tujhe mā'lūm honā chāhiye

qīmtī shai DhūñDne niklegā kho dene ke baad

zaat ke sayyad haiñ apnī baat ke pakke haiñ ham

dil to kyā kuchh bhī nahīñ lete suno dene ke baad

ham mohabbat kī nazar se dekhte haiñ har taraf

nafratoñ ke biij zer-e-qalb bo dene ke baad

fikr ke dhage mein lafzon ko piro dene ke baad

main wo shair hun jo hans deta hai ro dene ke baad

hausla to dekhiye aae ayaadat ke liye

yar meri pusht mein KHanjar chubho dene ke baad

yan nahin to wan khulega raaz mere qatl ka

bach nahin sakte lahu ke dagh dho dene ke baad

chhoDne wale tujhe ma'lum hona chahiye

qimti shai DhunDne niklega kho dene ke baad

zat ke sayyad hain apni baat ke pakke hain hum

dil to kya kuchh bhi nahin lete suno dene ke baad

hum mohabbat ki nazar se dekhte hain har taraf

nafraton ke bij zer-e-qalb bo dene ke baad