fikr ke sare dhage TuTe zehn bhi ab mazur hua

fikr ke saare dhāge TuuTe zehn bhī ab ma.azūr huā

ab ke bahār ye kaisī aa.ī kaisā ye dastūr huā

kal-purzoñ kā rūh-e-ravāñ ye aur vo sarmā.e kī joñk

lekin us kī nazroñ meñ ye dhartī kā nāsūr huā

din kī safedī terī nazar meñ raat kī kaalī chādar hai

raat kā ḳhūnī añdhiyārā bhī terī nazar meñ nuur huā

jab se dekhā hai khetoñ meñ maiñ ne zālim dhuup kā ruup

tab se terī zulf kā saaya duur bahut hī duur huā

zulm ko us ne zulm kahā hai jabr ko us ne jabr kahā

ya.anī 'ziyā' ab 'ziyā' nahīñ hai vaqt kā vo mansūr huā

fikr ke sare dhage TuTe zehn bhi ab mazur hua

ab ke bahaar ye kaisi aai kaisa ye dastur hua

kal-purzon ka ruh-e-rawan ye aur wo sarmae ki jonk

lekin us ki nazron mein ye dharti ka nasur hua

din ki safedi teri nazar mein raat ki kali chadar hai

raat ka KHuni andhiyara bhi teri nazar mein nur hua

jab se dekha hai kheton mein main ne zalim dhup ka rup

tab se teri zulf ka saya dur bahut hi dur hua

zulm ko us ne zulm kaha hai jabr ko us ne jabr kaha

yani 'ziya' ab 'ziya' nahin hai waqt ka wo mansur hua