فکر و احساس کا سرمایہ دوکانوں میں نہ تھا

فکر و احساس کا سرمایہ دوکانوں میں نہ تھا

اپنا جو کچھ تھا کتابوں میں تھا گلیوں میں نہ تھا

ورنہ میں پھیل گیا ہوتا خلاؤں کی طرح

ہاتھ سورج کا مری سوچ کے ہاتھوں میں نہ تھا

اور بھی گاؤں تھے پیاسے یوں ہی رستہ رستہ

اک مرا گاؤں ہی بادل کی نگاہوں میں نہ تھا

کتنی سوچوں کا لہو چاٹ گئے کیا معلوم

پہلے یہ رنگ ان اوراق کے چہروں میں نہ تھا

رات آنکھوں کے جھروکوں سے عجب شور اٹھا

جانے کیا بات تھی کوئی بھی تو سپنوں میں نہ تھا

ورنہ میں اور مرا نام افق تا بہ افق

مجھ سے شاید کوئی آکاش کی بانہوں میں نہ تھا

یوں تو سب چہرے مرے اپنے ہی چہرے تھے مگر

مجھ سا تنہا کوئی اس شہر کے لوگوں میں نہ تھا