fikr-o-ehsas ka sarmaya dukanon mein na tha

fikr-o-ehsās kā sarmāya dūkānoñ meñ na thā

apnā jo kuchh thā kitāboñ meñ thā galiyoñ meñ na thā

varna maiñ phail gayā hotā ḳhalāoñ kī tarah

haath sūraj kā mirī soch ke hāthoñ meñ na thā

aur bhī gaañv the pyāse yūñhī rasta rasta

ik mirā gaañv hī bādal kī nigāhoñ meñ na thā

kitnī sochoñ kā lahū chaaT ga.e kyā ma.alūm

pahle ye rang un aurāq ke chehroñ meñ na thā

raat āñkhoñ ke jharokoñ se ajab shor uThā

jaane kyā baat thī koī bhī to sapnoñ meñ na thā

varna maiñ aur mirā naam ufuq-tā-ba-ufuq

mujh se shāyad koī ākāsh kī bāñhoñ meñ na thā

yuuñ to sab chehre mire apne hī chehre the magar

mujh sā tanhā koī is shahr ke logoñ meñ na thā

fikr-o-ehsas ka sarmaya dukanon mein na tha

apna jo kuchh tha kitabon mein tha galiyon mein na tha

warna main phail gaya hota KHalaon ki tarah

hath suraj ka meri soch ke hathon mein na tha

aur bhi ganw the pyase yunhi rasta rasta

ek mera ganw hi baadal ki nigahon mein na tha

kitni sochon ka lahu chaT gae kya malum

pahle ye rang un auraq ke chehron mein na tha

raat aankhon ke jharokon se ajab shor uTha

jaane kya baat thi koi bhi to sapnon mein na tha

warna main aur mera nam ufuq-ta-ba-ufuq

mujh se shayad koi aakash ki banhon mein na tha

yun to sab chehre mere apne hi chehre the magar

mujh sa tanha koi is shahr ke logon mein na tha