فکر و نظر کے باب جہاں مسترد ہوئے

فکر و نظر کے باب جہاں مسترد ہوئے

جہل و جنوں کے خواب جہاں مستند ہوئے

اک سیل بے اماں ہے مرے غم کا کارواں

کیا کیا حسین لوگ سپرد لحد ہوئے

دیوانگی کبھی مرا مسلک نہیں رہی

گم آ کے تیری بزم میں ہوش و خرد ہوئے

آنسو کا میرے رنگ تب و تاب وہ کہاں

دامن میں یوں تو آپ کے گلہائے صد ہوئے

دنیا سمجھ رہی تھی کہ بد کار ہیں مگر

بدنام پہلے ہم ہوئے پھر جا کے بد ہوئے

میں بحر بیکراں سی محبت کا ہوں امین

آنسو تمہاری چاہ میں میری سند ہوئے

غیروں کو تھام کر نہ ہمیں بے مقام کر

ہم ہر خوشی سے تیرے لیے نابلد ہوئے

الہام نظم کرتے رہے ہیں نویدؔ ہم

شاعر تھے اہل زر تو نہ تھے مسترد ہوئے