fikr-o-nazar ke bab jahan mustarad hue

fikr-o-nazar ke baab jahāñ mustarad hue

jahl-o-junūñ ke ḳhvāb jahāñ mustanad hue

ik sail-e-be-amāñ hai mire ġham kā kārvāñ

kyā kyā hasīn log sipurd-e-lahad hue

dīvāngī kabhī mirā maslak nahīñ rahī

gum aa ke terī bazm meñ hosh-o-ḳhirad hue

aañsū kā mere rang tab-o-tāb vo kahāñ

dāman meñ yuuñ to aap ke gulhā-e-sad hue

duniyā samajh rahī thī ki bad-kār haiñ magar

badnām pahle ham hue phir jā ke bad hue

maiñ bahr-e-be-karāñ sī mohabbat kā huuñ amiin

aañsū tumhārī chaah meñ merī sanad hue

ġhairoñ ko thaam kar na hameñ be-maqām kar

ham har ḳhushī se tere liye nā-balad hue

ilhām nazm karte rahe haiñ 'naved' ham

shā.ir the ahl-e-zar to na the mustarad hue

fikr-o-nazar ke bab jahan mustarad hue

jahl-o-junun ke KHwab jahan mustanad hue

ek sail-e-be-aman hai mere gham ka karwan

kya kya hasin log sipurd-e-lahad hue

diwangi kabhi mera maslak nahin rahi

gum aa ke teri bazm mein hosh-o-KHirad hue

aansu ka mere rang tab-o-tab wo kahan

daman mein yun to aap ke gulha-e-sad hue

duniya samajh rahi thi ki bad-kar hain magar

badnam pahle hum hue phir ja ke bad hue

main bahr-e-be-karan si mohabbat ka hun amin

aansu tumhaari chah mein meri sanad hue

ghairon ko tham kar na hamein be-maqam kar

hum har KHushi se tere liye na-balad hue

ilham nazm karte rahe hain 'nawed' hum

shair the ahl-e-zar to na the mustarad hue