fikr se alfaz tak phaila hua meri tarah

fikr se alfāz tak phailā huā merī tarah

maiñ na thā sach hai magar vo kaun thā merī tarah

kab gumāñ guzrā ki tanhā.ī meñ sannāTā koī

dāstāñ apnī sunā kar chup huā merī tarah

kuchh na kuchh pahchān apnī chhoḌ jaatā vo zarūr

ban ke bahr-e-be-karāñ jo phailtā merī tarah

koī saaya bhī nahīñ thā zindagī ke dasht meñ

jheltā jo be-yaqīnī kī sazā merī tarah

aa.ine kahte nahīñ lekin mujhe ma.alūm hai

ret mujh jaisī hai parbat kī havā merī tarah

koī apnī zaat kā irfān paane ke liye

ho na jaa.e apne andar khokhlā merī tarah

sabz rut kī dāstāñ jalte hue aurāq par

koī mere baad bhī kyā likh sakā merī tarah

ai ġharīb-e-shahr ai begāna-e-harf-e-navā

pāniyoñ par naqsh apnā chhoḌ jā merī tarah

fikr se alfaz tak phaila hua meri tarah

main na tha sach hai magar wo kaun tha meri tarah

kab guman guzra ki tanhai mein sannaTa koi

dastan apni suna kar chup hua meri tarah

kuchh na kuchh pahchan apni chhoD jata wo zarur

ban ke bahr-e-be-karan jo phailta meri tarah

koi saya bhi nahin tha zindagi ke dasht mein

jhelta jo be-yaqini ki saza meri tarah

aaine kahte nahin lekin mujhe malum hai

ret mujh jaisi hai parbat ki hawa meri tarah

koi apni zat ka irfan pane ke liye

ho na jae apne andar khokhla meri tarah

sabz rut ki dastan jalte hue auraq par

koi mere baad bhi kya likh saka meri tarah

ai gharib-e-shahr ai begana-e-harf-e-nawa

paniyon par naqsh apna chhoD ja meri tarah