firaq-mausam ke aasman mein ujaD tare juDe hue hain

firāq-mausam ke āsmāñ meñ ujaaḌ taare juḌe hue haiñ

nadī ke dāman meñ hansrājoñ ke sard lāshe gire hue haiñ

chamakte mausam kā rañg phailā thā jis se āñkheñ dhanak huī thiiñ

aur ab basārat kī narm miTTī meñ thuur kāñTe uge hue haiñ

tire darīche ke ḳhvāb dekhe the raqs karte hue dinoñ meñ

ye din to dekho jo aaj niklā hai dast-o-pā sab kaTe hue haiñ

ḳhumār kaisā thā ham-rahī kā shumār ghaḌiyoñ kā bhuul baiThe

tire nagar ke faqīr ab tak us ek shab meñ ruke hue haiñ

use adāvat thī us sabā se jo mere chehre ko chhū guzartī

vo ab nahīñ hai to apne āñgan meñ lū ke Dere lage hue haiñ

rahoge thāme yūñhī ye chaukhaT agarche ik bhī nazar na Dālūñ

hañsāo mat ghar ko lauT jaao ye raag mere sune hue haiñ

kahāñ ruke the vo kyā shajar the ki jin ke saa.e meñ ham khaḌe the

vo dhuup kaisī thī jis kī bārish se mere sahrā hare hue haiñ

firaq-mausam ke aasman mein ujaD tare juDe hue hain

nadi ke daman mein hansrajon ke sard lashe gire hue hain

chamakte mausam ka rang phaila tha jis se aankhen dhanak hui thin

aur ab basarat ki narm miTTi mein thur kanTe uge hue hain

tere dariche ke KHwab dekhe the raqs karte hue dinon mein

ye din to dekho jo aaj nikla hai dast-o-pa sab kaTe hue hain

KHumar kaisa tha ham-rahi ka shumar ghaDiyon ka bhul baiThe

tere nagar ke faqir ab tak us ek shab mein ruke hue hain

use adawat thi us saba se jo mere chehre ko chhu guzarti

wo ab nahin hai to apne aangan mein lu ke Dere lage hue hain

rahoge thame yunhi ye chaukhaT agarche ek bhi nazar na Dalun

hansao mat ghar ko lauT jao ye rag mere sune hue hain

kahan ruke the wo kya shajar the ki jin ke sae mein hum khaDe the

wo dhup kaisi thi jis ki barish se mere sahra hare hue hain