firaq-o-hijr ke lamhe jo Tal gae hote

firāq-o-hijr ke lamhe jo Tal ga.e hote

hamāre zehn ke ḳhāke badal ga.e hote

vo maslahat kā taqāzā agar samajh jaatā

tamām shahr ke lahje badal ga.e hote

agar sharīk-e-safar vo bhī ho gayā hotā

tamāzatoñ ke ye sūraj bhī Dhal ga.e hote

qadam uThā.e haiñ kuchh soch kar mohabbat meñ

sañbhalnā hotā hameñ to sañbhal ga.e hote

vafā-pasand agar vo bhī ho gayā hotā

hamāre rāste kitne badal ga.e hote

jo thoḌī der na aatā ḳhayāl-e-tanhā.ī

tumhāre shahr kī had se nikal ga.e hote

'nazar' ko mohlat-e-nazzārgī agar miltī

nigāh-e-shauq ke armāñ nikal ga.e hote

firaq-o-hijr ke lamhe jo Tal gae hote

hamare zehn ke KHake badal gae hote

wo maslahat ka taqaza agar samajh jata

tamam shahr ke lahje badal gae hote

agar sharik-e-safar wo bhi ho gaya hota

tamazaton ke ye suraj bhi Dhal gae hote

qadam uThae hain kuchh soch kar mohabbat mein

sanbhalna hota hamein to sanbhal gae hote

wafa-pasand agar wo bhi ho gaya hota

hamare raste kitne badal gae hote

jo thoDi der na aata KHayal-e-tanhai

tumhaare shahr ki had se nikal gae hote

'nazar' ko mohlat-e-nazzargi agar milti

nigah-e-shauq ke arman nikal gae hote