firaq o wasl se haT kar koi rishta hamara ho

firāq o vasl se haT kar koī rishta hamārā ho

baġhair us ke bhī shāyad zindagī ham ko gavārā ho

nikal aa.e jo ham ghar se to sau raste nikal aa.e

abas thā sochnā ghar meñ koī ġhaibī ishāra ho

na is Dhab kī bhī zulmat ho ki sab mil kar duā māñgeñ

koī jugnū hī aa nikle na gar koī sitāra ho

ziyāñ kī zad pe duniyā meñ ka.ī log aur bhī hoñge

to phir ai nā-murādī tū mire ġham kā sahārā ho

taqābul kasrat o qillat kā kuchh ma.anī nahīñ rakhtā

añdherā chiir kar nikle agarche ik sharāra ho

purāne ġham tire to juzv-e-jāñ ham ne banā Daale

bisāt-e-dil kī ḳhvāhish hai na.e ġham kā utārā ho

fasīl-e-shahr pe raushan agar hoñ husn kī sham.eñ

to ik ik lafz 'shāhid' raushnī kā isti.āra ho

firaq o wasl se haT kar koi rishta hamara ho

baghair us ke bhi shayad zindagi hum ko gawara ho

nikal aae jo hum ghar se to sau raste nikal aae

abas tha sochna ghar mein koi ghaibi ishaara ho

na is Dhab ki bhi zulmat ho ki sab mil kar dua mangen

koi jugnu hi aa nikle na gar koi sitara ho

ziyan ki zad pe duniya mein kai log aur bhi honge

to phir ai na-muradi tu mere gham ka sahaara ho

taqabul kasrat o qillat ka kuchh mani nahin rakhta

andhera chir kar nikle agarche ek sharara ho

purane gham tere to juzw-e-jaan hum ne bana Dale

bisat-e-dil ki KHwahish hai nae gham ka utara ho

fasil-e-shahr pe raushan agar hon husn ki shamen

to ek ek lafz 'shahid' raushni ka istiara ho