fitna-pardazi adu ka nam hai

fitna-pardāzī adū kā naam hai

naam 'rahbar' kā yūñhī badnām hai

ranj-o-ġham meñ bhī hameñ baḳhshā sukūñ

zindagī bar-dosh mai kā jaam hai

piine vāloñ ko salīqa hī nahīñ

mai-kada to muft meñ badnām hai

terī aamad āmad-e-sub.h-e-bahār

terā jaanā zindagī kī shaam hai

tujh se mil kar ab khulā ham par ye raaz

hijr meñ tere bahut ārām hai

maut āñkheñ khol degī ek din

tishna-e-hastī barā.e naam hai

jal rahe haiñ muft meñ ahl-e-hasad

ham ko to mashq-e-suḳhan se kaam hai

pursish-e-bīmār-e-ġham ab hai abas

zindagī kā maut hī anjām hai

is ġhazal kī daad ye 'rahbar' milī

aaj har lab par tumhārā naam hai

fitna-pardazi adu ka nam hai

nam 'rahbar' ka yunhi badnam hai

ranj-o-gham mein bhi hamein baKHsha sukun

zindagi bar-dosh mai ka jam hai

pine walon ko saliqa hi nahin

mai-kada to muft mein badnam hai

teri aamad aamad-e-subh-e-bahaar

tera jaana zindagi ki sham hai

tujh se mil kar ab khula hum par ye raaz

hijr mein tere bahut aaram hai

maut aankhen khol degi ek din

tishna-e-hasti barae nam hai

jal rahe hain muft mein ahl-e-hasad

hum ko to mashq-e-suKHan se kaam hai

pursish-e-bimar-e-gham ab hai abas

zindagi ka maut hi anjam hai

is ghazal ki dad ye 'rahbar' mili

aaj har lab par tumhaara nam hai