فتنہ پرور ہے فتنہ زا ہے جھوٹ

فتنہ پرور ہے فتنہ زا ہے جھوٹ

ہر برائی کی ابتدا ہے جھوٹ

جھوٹ مانو نہ تم کہا میرا

منہ پہ جھوٹے کے کھیلتا ہے جھوٹ

نام رکھا ہے اس کا پالیسی

کیسا مقبول ہو گیا ہے جھوٹ

جو قسم بات بات پر کھائے

جان لو تم یہ بک رہا ہے جھوٹ

پا نہیں سکتا ہے دروغ فروغ

کیا بزرگوں نے یہ کہا ہے جھوٹ

سانچ کو آنچ تک نہ پہنچے گی

لاکھ دنیا میں چل رہا ہے جھوٹ

بچ کے جھوٹے سے چاہئے رہنا

پردۂ مکر اور دغا ہے جھوٹ

جھوٹ کو جھوٹ گر کہا ہم نے

تم ہی کہہ دو کہ اس میں کیا ہے جھوٹ

کانپ اٹھتا ہے اے عطا ایمان

جب کوئی شخص بولتا ہے جھوٹ