fitnon ka karobar hai aao dua karen

fitnoñ kā kārobār hai aao duā kareñ

har-sū ik intishār hai aao duā kareñ

tahzīb-e-rakh-rakhāo aur ādāb-e-zindagī

nasloñ pe jaise baar hai aao duā kareñ

mauj-e-nasīm bād-e-sabā ke liye bhī ab

har phuul jaise ḳhaar hai aao duā kareñ

ik haq-parast aam nigāhoñ meñ in dinoñ

jaise gunāhgār hai aao duā kareñ

har har qadam pe galiyoñ meñ aur shāhrāh par

tahzīb sharmsār hai aao duā kareñ

aksar ḳhatīb-e-shahr kā irshād-e-āliya

lafzoñ kā ik hisār hai aao duā kareñ

afsos sirf luqma-e-tar kī havas meñ aaj

insāñ zalīl-o-ḳhvār hai aao duā kareñ

māl-o-manāl jāh-o-hasham kā bas ik junūñ

a.asāb par savār hai aao duā kareñ

apnā zamīr bechne vaalā hī āj-kal

logoñ meñ zī-vaqār hai aao duā kareñ

makr-o-fareb aur riyā-kāriyoñ kā shaġhl

ab vaj.h-e-iftiḳhār hai aao duā kareñ

dhartī pe rah ke karte haiñ baat āsmān kī

yuuñ ziist se farār hai aao duā kareñ

allāh re huqūq-o-farā.ez kā har amal

ik dūsre pe baar hai aao duā kareñ

'fāḳhir' anā kī pyaas bujhāne ke vāste

har shaḳhs be-qarār hai aao duā kareñ

fitnon ka karobar hai aao dua karen

har-su ek intishaar hai aao dua karen

tahzib-e-rakh-rakhao aur aadab-e-zindagi

naslon pe jaise bar hai aao dua karen

mauj-e-nasim baad-e-saba ke liye bhi ab

har phul jaise KHar hai aao dua karen

ek haq-parast aam nigahon mein in dinon

jaise gunahgar hai aao dua karen

har har qadam pe galiyon mein aur shahrah par

tahzib sharmsar hai aao dua karen

aksar KHatib-e-shahr ka irshad-e-aliya

lafzon ka ek hisar hai aao dua karen

afsos sirf luqma-e-tar ki hawas mein aaj

insan zalil-o-KHwar hai aao dua karen

mal-o-manal jah-o-hasham ka bas ek junun

aasab par sawar hai aao dua karen

apna zamir bechne wala hi aaj-kal

logon mein zi-waqar hai aao dua karen

makr-o-fareb aur riya-kariyon ka shaghl

ab wajh-e-iftiKHar hai aao dua karen

dharti pe rah ke karte hain baat aasman ki

yun zist se farar hai aao dua karen

allah re huquq-o-faraez ka har amal

ek dusre pe bar hai aao dua karen

'faKHir' ana ki pyas bujhane ke waste

har shaKHs be-qarar hai aao dua karen