fitrat-e-husn mein agar ahliyat-e-wafa nahin

fitrat-e-husn meñ agar ahliyat-e-vafā nahīñ

mujh ko ḳhudā se hai gila aap se kuchh gila nahīñ

niiñd meñ hai abhī kalī phuul abhī khilā nahīñ

barbat-e-ishq par magar naġhma-e-dil chhiḌā nahīñ

ishq kī ibtidā to hai ishq kī intihā nahīñ

ishq hai vo baqā sarisht jis ko kabhī fanā nahīñ

merī shab-e-firāq kī pūchh na kuchh musībateñ

jiinā to be-mazā hī thā marne meñ bhī mazā nahīñ

mahfileñ jo ujaḌ ga.iiñ saj bhī ga.iiñ hazār baar

merā jahān-e-ārzū ujḌā to phir basā nahīñ

roz vafā.eñ bhī karūñ roz jafā.eñ bhī sahūñ

banda-e-husn huuñ magar husn mirā ḳhudā nahīñ

rāh-e-talab kī mushkileñ aur ye merī ḳhud-ravī

chāroñ taraf huuñ maiñ hī maiñ koī bhī dūsrā nahīñ

ḳhud ko miTā ḳhudī ko chhoḌ qaid-e-ta.a.īnāt toḌ

ek hai asl husn-o-ishq koī judā judā nahīñ

ishq meñ chāhe jaan jaa.e shikva magar na lab pe aa.e

hazrat-e-dil ye haa.e haa.e ishq kā qā.eda nahīñ

dil ho ḳhayāl-e-yār meñ aañkh ho intizār meñ

mere dil-e-figār meñ hasrat-e-mā-sivā nahīñ

rāh-e-vafā kī Thokareñ aur mirā tan-e-figār

ab bhī ye imtihān-e-ishq ho gayā ḳhatm yā nahīñ

māñgtā huuñ nigāh se terī gudāz-e-soz-e-barq

mujh ko ba-qadr-e-zarf-e-dil lutf-e-ḳhalish milā nahīñ

varta-e-zindagī meñ 'mauj' kyoñ haiñ ye nā-umīdiyāñ

merā ḳhudā to saath hai kyā hai jo nāḳhudā nahīñ

fitrat-e-husn mein agar ahliyat-e-wafa nahin

mujh ko KHuda se hai gila aap se kuchh gila nahin

nind mein hai abhi kali phul abhi khila nahin

barbat-e-ishq par magar naghma-e-dil chhiDa nahin

ishq ki ibtida to hai ishq ki intiha nahin

ishq hai wo baqa sarisht jis ko kabhi fana nahin

meri shab-e-firaq ki puchh na kuchh musibaten

jina to be-maza hi tha marne mein bhi maza nahin

mahfilen jo ujaD gain saj bhi gain hazar bar

mera jahan-e-arzu ujDa to phir basa nahin

roz wafaen bhi karun roz jafaen bhi sahun

banda-e-husn hun magar husn mera KHuda nahin

rah-e-talab ki mushkilen aur ye meri KHud-rawi

chaaron taraf hun main hi main koi bhi dusra nahin

KHud ko miTa KHudi ko chhoD qaid-e-tainat toD

ek hai asl husn-o-ishq koi juda juda nahin

ishq mein chahe jaan jae shikwa magar na lab pe aae

hazrat-e-dil ye hae hae ishq ka qaeda nahin

dil ho KHayal-e-yar mein aankh ho intizar mein

mere dil-e-figar mein hasrat-e-ma-siwa nahin

rah-e-wafa ki Thokaren aur mera tan-e-figar

ab bhi ye imtihan-e-ishq ho gaya KHatm ya nahin

mangta hun nigah se teri gudaz-e-soz-e-barq

mujh ko ba-qadr-e-zarf-e-dil lutf-e-KHalish mila nahin

warta-e-zindagi mein 'mauj' kyon hain ye na-umidiyan

mera KHuda to sath hai kya hai jo naKHuda nahin