فطرتاً ربط ہے دل کو غم و آلام کے ساتھ

فطرتاً ربط ہے دل کو غم و آلام کے ساتھ

کھیلتے رہتے ہیں ہم گردش ایام کے ساتھ

روز صیاد کا خطرہ ہے نئے دام کے ساتھ

کیا نشیمن میں رہے گا کوئی آرام کے ساتھ

ہم اگر خاک بسر ہیں تو کوئی بات نہیں

رقص کرتی رہے دنیا سحر و شام کے ساتھ

اے پرستار نئی صبح کے اتنا تو بتا

کیوں سیہ پوش اجالے ہیں در و بام کے ساتھ

آرزوؤں کی جواں موت کا ماتم ہے فضول

یہ جنازے کبھی اٹھتے نہیں کہرام کے ساتھ

تھا عجب ہوش ربا کیف مئے آزادی

زہر بھی پی گئے ہم بادۂ گلفام کے ساتھ

دوستی ہم نہیں رکھتے یہ بجا ہے لیکن

دشمنی بھی تو نہیں بندۂ اصنام کے ساتھ

یہ ملا اپنی وفاؤں کا ہمیں تلخ جواب

کہ ستم اور بھی ڈھائے گئے الزام کے ساتھ

کچھ بھی کہتے رہیں اہل حرم و دیر مجھے

آپ کا نام تو شامل ہے مرے نام کے ساتھ