fitratan rabt hai dil ko gham-o-alam ke sath

fitratan rabt hai dil ko ġham-o-ālām ke saath

khelte rahte haiñ ham gardish-e-ayyām ke saath

roz sayyād kā ḳhatra hai na.e daam ke saath

kyā nasheman meñ rahegā koī ārām ke saath

ham agar ḳhāk-basar haiñ to koī baat nahīñ

raqs kartī rahe duniyā sahar-o-shām ke saath

ai parastār na.ī sub.h ke itnā to batā

kyoñ siyah-posh ujāle haiñ dar-o-bām ke saath

ārzūoñ kī javāñ maut kā mātam hai fuzūl

ye janāze kabhī uThte nahīñ kohrām ke saath

thā ajab hosh-rubā kaif-e-mai-e-āzādī

zahr bhī pī ga.e ham bāda-e-gulfām ke saath

dostī ham nahīñ rakhte ye bajā hai lekin

dushmanī bhī to nahīñ banda-e-asnām ke saath

ye milā apnī vafāoñ kā hameñ talḳh javāb

ki sitam aur bhī Dhaa.e ga.e ilzām ke saath

kuchh bhī kahte raheñ ahl-e-haram-o-dair mujhe

aap kā naam to shāmil hai mire naam ke saath

fitratan rabt hai dil ko gham-o-alam ke sath

khelte rahte hain hum gardish-e-ayyam ke sath

roz sayyaad ka KHatra hai nae dam ke sath

kya nasheman mein rahega koi aaram ke sath

hum agar KHak-basar hain to koi baat nahin

raqs karti rahe duniya sahar-o-sham ke sath

ai parastar nai subh ke itna to bata

kyon siyah-posh ujale hain dar-o-baam ke sath

aarzuon ki jawan maut ka matam hai fuzul

ye janaze kabhi uThte nahin kohram ke sath

tha ajab hosh-ruba kaif-e-mai-e-azadi

zahr bhi pi gae hum baada-e-gulfam ke sath

dosti hum nahin rakhte ye baja hai lekin

dushmani bhi to nahin banda-e-asnam ke sath

ye mila apni wafaon ka hamein talKH jawab

ki sitam aur bhi Dhae gae ilzam ke sath

kuchh bhi kahte rahen ahl-e-haram-o-dair mujhe

aap ka nam to shamil hai mere nam ke sath